Uncle Ray鬼鼠挑機一事﹐由於實在太高興﹐單係講述佢D鬼鼠威水史﹐就已經高興到慶祝罄竹難書﹐搞到要分兩篇。

分兩篇﹐係廢事有D傻佬﹐以為我無料駁條契弟﹐要靠鬧條契弟鬼鼠轉移視線...今鋪﹐我決定正式回應Uncle Ray堆廢話有乜漏洞...

首先﹐Uncle Ray話慶祝國慶﹐就等於「為殺人政府歡呼」﹐我就已經覺得好爆笑。

Grumpy係Uncle Ray個blog度﹐話慶祝國慶者﹐就等於黨國不分﹐我真係想講﹕究竟係邊個黨國不分呢﹖

D人成日話﹐愛國唔等於愛黨嘛﹖我想大家先搞清楚一個問題﹕請問十月一日係國慶日呀﹖定係黨慶日呢﹖

我可以好斬釘截鐵話比大家聽﹐十月一日係國慶日﹐中共黨慶日呢﹐係七月一日﹗

係咪好神奇呢﹖原來香港回歸日﹐其實先係中共黨慶日呀﹗我有時係度諗﹐阿爺揀七一回歸﹐同七一係黨慶日有咩關係。

呢方面﹐連中國共產黨都反而分得好清楚﹐黨慶就係黨慶﹐國慶就係國慶。

偏偏有D人﹐因為反共﹐又覺得共產黨黨國不分﹐所以反共反到連慶祝國慶﹐都可以話係「為殺人政府歡呼」﹗

Ecuse me﹐如果你真係認為愛國唔等於愛黨﹐你就應該清楚分別﹐你再唔認同中共政權好﹐中華人民共和國係現今中國國號﹐受聯合國承認﹐如果你係中華人民共和國公民﹐慶祝國慶就係十月一日。

果D人應該好清楚現代國家概念﹐你唔好同我鬼五馬六﹐賴係學術﹐同我講乜春國家概念問題。你可以唔承認中華人民共和國﹐你可以覺得中華人民共和國=/=中國﹐問題係﹐全世界都承認﹐你唔承認咋嘛﹖

同埋﹐既然你唔承認中華人民共和國﹐你咪放棄中國國籍囉﹖講咁多做乜春。

再講﹐既然班友要講黨還黨﹑國還國啦﹖請你先搞清楚﹐中華人民共和國作為一個國家﹐同中華人民共和國中央人民政府邊個打骰﹐根本無直接關連。

換言之﹐即使第日中共唔再係執政黨﹐又或者中國第日好似鬼佬搞乜鬼代議民主制度﹐只要唔修憲更改中國國號﹐中華人民共和國﹐依係係叫中華人民共和國﹔只要唔修憲更改國慶日日期﹐中國國慶依然係十一。

我去慶祝國慶﹐又唔係慶祝黨慶﹐你鬧乜春“為殺人政府歡呼”呀﹖我係依照最正宗嘅西方現代國家概念﹐以聯合國承認嘅中國概念﹐去為自己所屬國家慶祝生日﹐點“為殺人政府歡呼”呀﹖

仲鬧人黨國不分﹐仲學人講鬼佬果套民主自由﹐連最基本黨慶國慶﹐都分唔清。仲講乜春呀﹖究竟係邊個搞唔清現代國家概念呀﹖

你要鬧共產黨點衰﹐去表述自己D反共意向呢﹐請你係黨慶日鬧﹗即使共產黨執政點衰好﹐同我為自己所屬國家搞生日﹐係“黨國分離”標準底下﹐根本無抵觸﹗

反而係國慶日走去鬧執政黨點PK呢﹐先真係黨國不分啦﹖你話人家黨國不分﹐你自己又跟住人家個邏輯行﹐又係黨國不分。自己黨國不分﹐就話所有人去慶祝國慶﹐都係黨國不分...真係痴乜線﹗﹗

最低能仲要係﹐條友連個topic都寫Q錯。乜春「為殺人政府歡呼」﹐excuse me﹐即使你要鬧﹐都應該係話「為殺人政權歡呼」。政府﹐係以每一屆任期而定﹐例如而家香港係煲呔曾做特首﹐你可以叫做曾蔭權政府﹔中共掌握執政權﹐就即係擁有政權﹐英文叫regime。

聽講條友讀書仲要多過我﹐連政權﹑政府之別都搞得錯﹐仲學人講政治﹐真係讀屎片之經典範例也!

至於有D人﹐以共產黨執政期間做過咩錯﹐令國家出過咩亂事﹐作為國慶就唔值得慶祝嘅理由...又係搞笑。

依呢個邏輯﹐有條友跌跛隻腳﹐就唔好搞生日﹗有條友入過冊﹐又呢世都唔可以搞生日﹐其他人見條友生日﹐就應該翻對方舊帳﹐講晒對方以前做過咩衰事...

我就覺得騎呢啦…關事嘛﹖你老婆﹑你老表﹑你老朋生日﹐可能條友曾經做過D對唔住嘅事﹐你會係生日數臭對方嘛﹖

唔會﹐只有仇人先會去咁做。

問題又來﹐既然你話黨國係應該分離﹐你話你自己愛國但係反共﹐你國家生日﹐你希望佢國泰民安﹐有乜問題呢﹖

再唔係﹐你反共嘛﹖你為你自己國家慶祝生日﹐生日願望係中共倒臺囉﹖咁都唔代表國慶就唔值得慶祝呀﹖

每個人價值觀﹐可以唔同。你反共﹐你想中共倒臺﹐你覺得中國只有中共倒臺先會國家民安﹔我覺得中共如果而家倒臺﹐大陸會亂﹐會打內戰﹐我希望中共自己唔好再咁kai﹐成為個好政黨﹐係咪就唔得先﹖就有問題先﹖

再講﹐即使唔愛黨﹐又未必等於反共。就好似阿Chris話和﹐希望大陸和平演變﹐中共自己開竅﹐學鬼佬搞代議民主制﹐搞乜鬼多黨政治﹐但既然話搞乜多黨政治﹐就即係中共到時搞選舉﹐只要果一刻﹐人民覺得中共仲係得嘅﹐中共就會照樣繼續執政啦﹖從理論上講﹐支持和平演變都唔等於反共ga﹖咁又有問題囉wor﹖

我係我篇《賀國慶》﹐就已經講得好清楚啦﹖我慶祝國慶﹐因為國家生日﹐我個生日願望﹐就係希望中國國泰民安﹑我家族人五代同堂﹗我理Q得中共係咪繼續執政呀﹖如果中共執政可以搞到中國國泰民安﹐我咪支持中共執政囉﹖如果中共執政搞到民不聊生﹐都唔洗我支唔支持啦﹐中共都會比人造反推翻啦﹖

學鄧小平話頭﹐黑貓白貓﹐祝到老鼠就係好貓。共產黨好國民黨好民主黨好﹐乜黨都好﹐搞到國泰民安﹐就係好政黨﹗

你覺得中共搞到大陸民不聊生﹐你有種咪去反佢滷味囉﹖係我眼見嘅大陸中﹐覺得中共即使有做得唔好﹐有時又好kai﹐但我又未覺得佢搞到我﹐我同我一家一族都有安樂茶飯食﹐咪由得中共繼續玩落去囉﹖

又事實上﹐歷朝歷代﹐即使係西方社會﹐邊個政黨執政好﹐只需要經濟搞得屎﹐人民無啖好食﹐就會自己作反﹐所謂民主國家就會投票踢走統治者啦﹖如果中共搞到大陸官逼民反﹐你唔洗鬧﹐佢就會自己收檔啦﹖佢未收檔﹐就梗係大家未覺得有造反必要呀嘛﹖

你反共﹐你要造反﹐你咪自己反飽佢囉﹖我唔跟你造反﹐我繼續自顧自搵食﹐我就無良知呀﹖我覺得改革開放確實搞返掂大陸﹐雖然仲有好多問題﹐但我對未來有信心﹐我expect阿爺會自動自覺識做﹐就好似有人好天真去希望大陸係唔流血情況下﹐會自己和平轉變﹐我唔大哎反共﹐我唔係國慶日翻舊帳﹑數中共臭史﹐我就有問題呀﹖

Uncle Ray﹐你咁交叉有良知﹐你咁交叉把炮﹐你真係去造反比我睇啦﹖你學孫中山去搞革命啦﹖你匿埋去山區打游擊啦﹐笨實﹗

講真﹐呢類反共の達人﹐我就最睇唔起﹗鬧中國共產黨﹐日日都有人鬧﹐甚至有人以此做寫手維生﹐基本上係人人都識。不過﹐鬧有實用咩﹖你唔妥中共﹐你就淨係識得鬧﹐係度嘈嘈嘈﹐靠鬧共產黨進行政治精神自慰﹗鬧Q完﹐又點呀﹖大部份﹐咪又係第二朝﹐戴住條狗帶﹐受人二分四﹐係老細面前做死狗﹖

當年孫中山反清﹐夠薑去搞革命﹗當年蔣介石搞清黨﹐白色恐怖﹐毛澤東夠膽虛打游擊﹐呢班所謂反共達人﹐有乜實際行動呢﹖Never﹗所謂反共﹐查實就係懼共﹗恐共﹗

哦哦哦﹐就係叫我地一齊去跟民主派遊行囉﹖做人家政治籌碼囉﹖之但係遊行又十九幾年啦﹖乜春六四晚會有搞十九幾年啦﹖佢地鬧果個共產黨﹐有無依佢地心意﹐去作出咩改變 呀﹖共產黨又有無比人和平演變咗呀﹖

無呀﹗人家睬你都有味呀﹗

又事實上﹐係我地普通小市民眼中﹐講一大堆政治﹐係無Q用ga﹗因為係現實生活中﹐政治其實距離我地好遠﹐我地生活一直只係還繞十二個大字﹕柴米油鹽﹑衣食住行﹑吃喝玩樂…

佢地口口聲聲反共﹐其實咪同我地一樣﹐政治只係一個吹水話題。Uncle Ray吹到自己點點點憎共產黨﹐亦只不過係想係網上﹐建立一個外表上憂國憂民嘅形象…

實情﹐咪又係得把死人口﹐講就天下無敵﹐做就無能為力﹖